İslam Dünyasından

Honkoqda müsəlmanlar məscid istəyirlər

 Honkonqda müsəlmanların sayı günbəgün artdığına görə, yeni məscidə ehtiyac olduğu açıqlanıb.

Şəhərdə müsəlmanların icma mərkəzi və müsəlman uşaqların daha yaxşı təhsil alması məqsədilə bir qurum təşkil edilməsini istəyirlər. Honkonqda hal-hazırda bu cür məqsədlərə xidmət edən rəsmi qurumların olmadığı bildirilir. Çin dilində danışmayan uşaqlar məktəbə gedə bilmədiyinə görə, buna ehtiyac olduğu qeyd edilir.

Hal-hazırda Honkonqda ancaq beş məscid var. Digər tərəfdən, Honkonqdakı müsəlman icmanın beş dəfə böyüdüyü bildirilib.

Honkonqdakı müsəlmanların sayının 200-250 min olduğu təxmin edilir.

 ABŞ-da 2 mindən çox məscid var

 2011-ci ilin faktlarına əsasən, ABŞ-da  2 600 000  müsəlman və 2106 məscid var. Ən çox məscid olan ilk beş ştat isə ardıcıl olaraq bunlardır:

• Nyu-york – 257 məscid
• Kaliforniya – 246 məscid
• Texas – 166 məscid
• Florida – 118 məscid
• İllinoys və Nyu-cersi – 109 məscid

Məscid tikintiləri 1920-30-cu illərdə artıb və 1952-ci ildə ABŞ-da 20-dən çox məscid var idi. ABŞ-dakı ilk məscidin 1915-ci ildə tikilməsinə baxmayaraq, ölkədə 1960-cı ilə qədər nisbətən az məscid inşa edilib. “Faith Communities Today”-in (FACT) apardığı araşdırmaya görə, ABŞ-dakı məscidlərin 87%-i son 30 il ərzində tikilib.

 Amerikalı müsəlmanlar məlumat azlığından şikayətlənirlər

 Amerikalı müsəlmanlardan qarşılaşdıqları ən əsas problemin nə olduğu soruşulub. 19% müsəlman ayrı-seçkilik, 15% terrorist kimi qəbul edilmək, 13% ictimaiyyətin İslam haqqında məlumatının az olması, 12% isə eyni qəlibə aid edilmək cavabını verib. Sorğuda iştirak edən amerikalı müsəlmanların 76%-i dünya səviyyəsində islami ekstremizmdən çox və ya bir az narahat olduqlarını, 61%-i isə ABŞ-da islami ekstremizmin formalaşması ehtimalından təşvişə düşdüklərini bildiriblər.

Bu vəziyyətin bəzi müsəlman qadınların evdən çıxmamasına səbəb olduğu deyilir.

 Tailandda müsəlman malaylar üçün TV kanal

Tailand hökuməti ölkədəki müsəlmanlar üçün ilk televiziya kanalı layihəsini həyata keçirib.

Malay dilində fəaliyyət göstərən kanal haqqında məlumat verən layihənin rəhbəri Çamrun Den-udom yeni kanalın qurulma məqsədinin müsəlman malaylarla taylandlı buddistlər arasındakı anlayışın artmasına kömək etmək olduğunu bildirib.

Çamrun Den-udom növbəti il 24 saat fəaliyyət göstərəcək “TV Malayu” kanalının ilk mərhələdə gündə yarım saat xəbər yayımlayacağını qeyd edib.

 Qadın keşiş kilsəyə gələnlərə Quran oxuyur

 Norveçin paytaxtı Osloda Yeni il vaxtı kilsəyə gələn şagirdlərə hz. İsa ilə bağlı Quran ayələrini oxuyan qadın keşiş peşman olmadığını deyib.

Klara Voql Ellinqsrud kilsəsində kiçik şagirdlərə “Məryəm” surəsindən bəzi ayələri oxuduqda çox qarşı çıxmışdılar. Xristian din adamlarından şagirdlərin valideynlərinə, partiya liderlərindən təhsil nazirliyinə qədər bir çox adam bu hadisəyə əks-münasibət göstərmişdi.

Norveçli keşiş Quranda hz. İsanın doğulmasından bəhs edən ayələrin çox təsirli və gözəl olduğunu bildirib. Bu qədər ciddi əks-münasibət göstəriləcəyini əvvəlcədən təxmin etmədiyini vurğulayan Voql yenə də peşman olmadığını ifadə edib.

Valideynlərin məsələ haqqında əvvəlcədən məlumat verilmədiyi ilə bağlı şikayətlərində haqlı olduqlarını deyən Klara Voql: “Ancaq yaxın ətrafımdan kilsədə Quran oxumağıma görə təbriklər gəlib. Hz. İsa haqqında Quranda məlumat olduğunu bilmək çox yaxşıdır. Bir olan Yaradana inanmaq materializm və sekulyarizmdən daha üstündür”, – deyib.